老娘的草根飯堂

今日同某人走左去東涌水口摸蜆，摸左勁多蜆+花甲，
晒到個人燶一燶，但好好玩 ，仲比租用具個老闆娘讚第一次就有咁好既收獲。
某人仲話d花甲全部都係公來的，因為d大隻既花甲都係我摸的!
佢就以蜆既數目羸我九條街。

花甲就留番第二朝(老闆娘話留得)，
即晚就煮左蜆黎吃左先。

結果實左太多喇，但因為摸得好辛苦，而且佢地咁不幸比我地摸到~唔應該嘥左佢，所以點飽都食晒佢!
飽到好鬼辛苦。

蜆的煮前作法:

- 先開一大煲水，加鹽同一隻鐵匙，浸蜆大約三小時
  (千祈唔好浸過夜，老闆娘話d蜆會死發臭的!)
- 因為我急住整，等到唔三~四小時。
  我就煲熱d水，較最小火，慢慢等d蜆開殼，一開就撈上來，之後將沙清洗乾淨。
- 煲蜆的水可以隔左d沙之後拎來滾湯，好鮮甜的。

蒜蓉豆豉炒蜆

材料:
- 蜆
- 豆豉
- 蒜蓉
- 蔥

汁料:
- 豆辧醬:２匙
- 糖
- 雞粉
- 蠔油
- 老抽　
- 生抽　
- 生粉　
- 紹酒　

煮法:
- 將豆豉"中"爛，蒜頭磨蓉
- 開鑊，落蜆，略炒
- 加豆豉蒜蓉炒勻
- 再加汁料炒至乾身，加上蔥略炒即可上碟。(我唔記得左加蔥，所以炒起左先補飛! )

清蒸桂花魚

材料:
- 桂花一條
- 蔥

汁料:
- 豉油
- 生油

煮法:
- 將魚挖鱗洗淨(通常魚檔會先挖一次，但多數挖唔乾淨，建議返屋企再洗多次)
- 抹一抹鹽，醃一陣再洗乾淨
- 先煲滾水，一半蔥鋪於碟上，放上魚，蒸大約十分鐘(按魚大小)，用筷子可輕易篤穿魚身即可。
- 再開鑊，落生油，豉油，蔥，滾起淋上魚上碟。

紫菜蜆湯

材料:
- 紫菜一餅(推介一隻台灣出的野生紫菜，貴少少但真係完全無沙 )
- 蜆

煮法:
- 紫菜浸散
- 滾起剛才煲蜆的水，加已浸發的紫菜和蜆煲滾，加鹽調味即可。