03.jpg  

大鄉里出省: 北海道道央九日八夜之旅 Day 4 - 小樽 ()

  

我地番jr目的係要坐去天狗山既巴士

天狗山聽聞係北海道第三大夜景

不過好似已經沒落了 

我去果d同車只有兩個老人家…

真係一個遊客都無  

   

 

不過天狗山仲有個滑雪場,我都見有d日本家庭揸車去

 

 個纜車係好古老果隻,仲要人手開門  

唔知係咪因為真係無乜人,為左吸引遊客

都推出左d幾吸引既package  

  

空中纜車和飲料套票(大人1240日圓)

   

而家貴左~要1300yen~

不過都抵既,佢個來回纜車張飛都要1140yen~

 

加160yen就可以要杯即磨咖啡,仲要睇住無敵夜景飲咖啡

即場開左包六花亭既士多啤梨朱古力黎配咖啡  

望住個景…

真係爽到震   

 

如果想係山頂食埋野就仲抵,

我見我地同行果兩個老人家係食野既,

D野食(無記錯係蛋包飯)個樣好ok的  

只係1700yen~真係好抵!

(btw, 果對老人家應該係夫婦喇…

真係超級sweet  ,頭髮白晒都手拖手去山頂食飯,

真係好令人羨慕,我全程都係咁偷望佢地…  )

   

  

  

 

飲完咖啡就可以出黎個滑雪場行下同去佢地個觀景台睇下景

(可惜當日好大雲,本來我夾好晒時間,但都睇唔到日落 )

   

因為真係無乜人,感覺好似包場咁…

鋪天蓋地都係雪,個天黑齊之後加幾次黃色街燈,仲有開始落雪…

個感覺你好特別,話浪漫又唔係,話寂寥又唔係…

有少少滄涼,有少少可惜(因為我覺得個地方都幾正但無咩人去,唔知會唔會因此關閉 ),但又有少少開心 (我好怕去d人多既地方… )

  

我之後plan左去食晚餐,睇好巴士時刻表就提早少少去定toilet,之後去等巴士

  

我真心希望自己唔好比人當係蝗國人…..   

 

  

等車途中見到之前係東京日光被困救命的粟米湯,

係漫天大雪之下一定要再買番罐回味下….  

 

大家都知日本巴士係好準時,我都未驚過  

不過原來上車同落車位置唔好 

上車係JR前面的巴士總站,落車係JR前兩條街一個普通街站

我地住到D人落晒車先知原來要落了…

不過一落左車其實D路都係熟口熟面,一落車望兩望就識行

(因為小樽唔大,由運河行上JR駅係一條上斜路,你邊行邊留意下D景,

落車望兩望就會認得  !)

  

之後就行去食晚餐,本身PLAN左食台灣人好推薦既『魚真』

聽聞係本地人好鍾意既小店

(我地入到去真係一個遊客都無,好易睇,全場得我地著得最多衫…  )

唔係大街,但好易搵,就係JR駅去運河方面果D斜路,

你見到間LAWSON,轉入去行入少少就見…

   

我地大約7點到去到,已經差唔多FULL HOUSE

好彩等左一張檯就有BAR檯位,都照坐啦!  

 

叫左網上推介既野,

- 壽司拼盤(十貫) (1900YEN)

- 蟹肉雜炊 (700YEN)

- 魚真燒(小) (800YEN)

(價錢未必100%準,只上網搵番資料同憑記憶)

    

另外,我就梗係叫我至愛既北海道啤酒  

唔飲得酒既某人就點左梳打水

  

黎野食之前會先上個湯(免費!),

好得意,用茶壺上,倒落杯仔飲

佢唔係一般的味噌湯

係海鮮湯黎,顏色好清,清到透明,

但好好味,同岩岩係雪地入鋪,比你暖一暖身

真係好窩心!!  

  

先上壽司拼盤,係北海道應該搵唔到唔新鮮既壽司

最愛既海膽、魚子唔洗講,其他都不過不失!

未到好驚喜,不過我唔係食家,咁既價錢只知係好抵食!  

  

跟住係蟹肉雜炊,又係為左彌補我食唔到蟹既遺憾

呢個係一定要叫既~

睇相好似見唔到蟹肉,只係因為我影得衰

佢D蟹肉沉晒底,都幾多,味道一定鮮,

食得出佢無加特別既調味,同埋份量好足,

一鍋都有3-4碗  

   

最後叫左係遊客都食既魚真燒,我一早做左功課,

要個細既,因為細既都好大盤,應該有成兩個薯仔…

加上大量芝士,中間係海膽+咸牛肉

無錯,係加左海膽~新鮮海膽….本身其實只係普通既芝士咸牛肉薯仔

但加左海膽即時升LV十倍

不過老實講…

老娘真係唔多鍾意熟左海膽既質感

因為佢上檯既係加左蓋,叫你等一等先開蓋

開蓋時,D海膽基本上已經熟晒….

熟左既海膽口感好實,好似熟魚卵咁,  

亦無左陣甜味…味道怪怪的

但個芝士薯仔係好味既,

咁多芝士係好難唔好食,

但亦因為超多芝士所以都幾膩…  

 

不過一場黎到,食得呢幾樣,又好似唔多夠喉咁

其實隔離已經望左幾庚

因為我地叫左幾樣都係超飽肚既野,但我地好似唔知飽咁

一路食仲一路睇住個MENU

 

今朝係三角市場,我已經留意到有種魚,

話係小樽名物,得呢度先有得吃刺身的『八角魚』

未飽到嘔既我又心思思

見到價錢唔貴(唔洗1000YEN)

 

 

就叫左一碟八角魚刺身

上碟時好像很大盤,擺盤好靚!!  

但其實魚肉很小塊

不會很HEAVY的!

而且八角魚唔係好油膩既魚,魚油不多

味道比較淡口,肉質爽爽的,

不過因為切得比較小,入口幾秒就吞左了

不能細細咀嚼,但口感好得意,

我係香港未食過 (因為老娘比較草根(窮),係唔會去食貴價日本菜的!  )

食完個刺身,好飽之下我地就返酒店先休息一下

 

其實食完飯都只係8點到,仲好早,

我地先回酒店CHECK-IN,之後再出去行運河睇夜景

今晚有得住我恨左好耐既dormy in

其實本身CHECK左札幌dormy in個價係打消左個念頭

因為我地budget有限,但plan到去小樽,

見到小樽dormy in個價($9790YEN)

有聲稱係真溫泉的燈之湯

仲有晚上提供任食拉麵

仲有早上的豐富早晨自助餐

只係港紙六百幾蚊….

好抵…..  

 

就決定留小樽一晚享受享受!!  

 

好順利咁check-in,上房hea左陣,

我地就落樓諗住去運河,

 

出到門口仲見到個welcome coffee機,仲有埋紙杯!!!

真係超好,天氣咁凍,我咁貪小便宜就梗係拎左杯

出雪地邊行邊飲啦!  

     

夜晚既運河同日頭真係好唔同,

連唔浪漫既老娘都覺得幾浪漫  

開頭我仲以為應該同城門河差唔多ge …(唔準嘲笑我!  )

但加埋d倉庫,加埋d雪就係兩回事

我諗如果係雪祭行應該仲浪漫 (但一定超多人!!!  )

   

我地終於成功砌到小雪人!(仲要有個心架!!!  )

仲要我地來回行,扮路過睇下有無人當景點影相,真係好無聊!  

  

開開心心咁hea行完,

就番去浸燈之湯同食拉麵

因為我地怕錯過左佢既拉麵時間

(供應時間係21:00-23:00)

所以我地去食左拉麵先,浸完有時間先再食!

  

唔好以為免費就會hea

你入去叫拉麵會先比個牌仔你

廚房真係即叫即做架,做好就會叫number叫你拎

簡簡單單但都足料好味,有紫菜有竹筍,仲有泡菜同茶比你拎

如果浸完餓餓地食會仲正!

不過而家好好味!  

 

食完就去沖涼~

我好鍾意日本既大浴場

好多人話怕除晒衫,其實邊有人睇你….

最多只可以話自己浸會有d

但伸直晒個人靜靜地浸真係好舒服….  

浸完真係過左拉麵時間了 (好彩之前食左…)

咁我就學以前睇卡通片d人浸完浴場去買牛奶飲

一個字: 爽呀!!!      

arrow
arrow
    全站熱搜

    老娘(_oldlady_) 發表在 痞客邦 留言(0) 人氣()